Artistas consagrados como Antón Pulido, Francisco Leiro, Manolo Moldes, Xaime Quessada ou Acisclo Manzano e outros noveis, son os e as autoras das preto de 300 obras de pintura, escultura, gravado e fotografía, e ás que tamén se sumarán vídeos, instalacións e audios, que integran a día de hoxe o Museo de arte da Universidade de Vigo. Localizadas ao aire libre, en escolas e facultades e en edificios administrativos dos tres campus, as 287 obras que integran esta recompilación do patrimonio artístico da UVigo nunca antes foran reunidas nun repositorio dixital co dobre obxectivo de, por unha banda, agrupalas, neste caso nunha páxina web, e pola outra, dalas a coñecer á comunidade universitaria e á sociedade.
A vicerreitora de Extensión Universitaria, Susana Reboreda, foi a encargada este martes de dar a coñecer os detalles desta iniciativa, que partiu da súa vicerreitoría, aínda que tomando a remuda dunha acción similar posta en marcha no campus de Ourense en 2014 e para a que foi preciso actualizar, mellorar e completar a documentación fotográfica. Un proceso, no que destacou a impliación dos técnicos de Cultura dos campus de Vigo, Alfonso Caride, e de Ourense, Filemón Rivas, e para o que se contactou con centros e servizos da UVigo solicitándolles información sobre obxectos patrimoniais de interese, contratándose ademais ao docente da UVigo e especialista en Historia da Arte Jorge Varela, que reformulou a ficha técnica e realizou as fotografías que se atopan na web
“Este libro reconstrúe a imaxe da soidade como unha experiencia creativa, central para a constitución de suxeitos e identidades, no corazón íntimo do proceso artístico”. Deste xeito presentan o profesor da Facultade de Belas Artes Alberto Ruiz de Samaniego e o artista e docente Miguel Copón Soledades. Estéticas del retiro, o libro no que reflexionan sobre como artistas, poetas ou pensadores de diferentes épocas “converteron o retiro, o silencio e a distancia social” nunha condición para a creación artística. Publicado por Cátedra, trátase dun volume no que, desde o campo da Estética, buscan conectar un amplo abano de obras, autores e autoras nunha reflexión sobre “o distanciamento paradoxal do social en busca dunha comunicación máis intensa”.
“O libro refírese a unha estética, é dicir, á conexión entre as artes, ou as súas imaxes, e o retiro”, sinala Ruiz de Samaniego respecto dun volume que definen como “un proxecto de investigación en curso” no seu texto de presentación. De feito, Soledades insírese na liña de colaboración que este escritor, docente e comisario mantén desde hai máis de 25 anos co investigador Miguel Copón, profesor de Estética na Escuela de las Artes Sur de Madrid. Ambos desenvolveran xa previamente proxectos como a exposición-ensaio Cabañas para pensar, que tiña na idea do retiro un dos seus eixes centrais.
Nacida no ano 1992 no Ateneo Santa Cecilia de Marín, co obxectivo de conmemorar o Día Internacional da Muller, a exposición Voilà la Femme alcanza nestas semanas a súa 33 edición, coas alumnas da Facultade de Belas Artes como principais protagonistas. Presentada pola súa comisaria, Celeste Garrido, como a “exposición de mulleres artistas con maior traxectoria de Europa”, reúne nesta edición as creacións de 17 artistas, a meirande parte estudantes deste centro do campus de Pontevedra. Faino ademais coa novidade de contar desta volta con dúas sedes, o propio Ateneo e o Museo Municipal Manuel Torres, nas que poderá visitarse ata o 27 de marzo.
Inaugurada a pasada semana, trátase dunha mostra que “dá visibilidade ás mulleres artistas, xeralmente recentemente graduadas e vinculadas dalgunha maneira con Galicia”, sinala Garrido, artista e colaboradora do grupo de investigación ES2 da Facultade de Belas Artes. Foi precisamente a súa coordinadora, a catedrática Yolanda Herranz, á que deu nome a unha exposición impulsada por Antón Castro e Antón Sobral co propósito de pór de relevo que “tanto na arte como en calquera outra disciplina, non se pode excluír a metade da poboación”, como lembra a súa comisaria. Garrido asumía en 1998 o comisariado desta mostra colectiva, avogando por unha “aposta firme pola arte emerxente”. Coordinada neste 2026 por Abril Iglesias e promovida coa colaboración do Concello de Marín, trátase dunha exposición que busca afondar en “aspectos directamente vinculados cos intereses das artistas mulleres, como son as cuestións de igualdade e xénero”.
Presentada pola organización como “unha das grandes citas internacionais da arte contemporánea”, ata este domingo desenvólvese no Ifema madrileño a 45 edición da Feira Internacional de Arte Contemporánea Arco. Xunto á presenza de máis de 200 galerías de 30 países, na súa programación insírese a feira de libro de artista e libro de arte ArtsLibris, onde o grupo de investigación dx5 da Facultade de Belas Artes busca dar a coñecer a súa traxectoria e liñas de investigación. Fano a través do conxunto de publicacións que reúnen no stand co que contan nunha feira na que participan máis de 90 editoriais, librarías e axentes culturais dunha vintena de países. Nela, o equipo investigador presenta tamén o proxecto gráfico un_ende, un libro de artista desenvolvido especificamente para este evento e que afonda na idea de arte múltiple de campo expandido combinando as creacións artísticas de dez das e dos seus integrantes.
Desde o grupo dx5 (digital & grahpic art research) destacan esta participación en Arco como unha oportunidade para “presentar no panorama da arte contemporánea, tanto nacional como internacional, a posición do grupo dx5 (digital & graphic art research) e a investigación que desenvolvemos”. Ademais de contar por primeira vez cun espazo en ArtsLibris entre este mércores e domingo, o equipo investigador de Belas Artes forma parte tamén da programación do speakers corner desta feira. Esta iniciativa, inserida na programación do Foro de Arco, permitirá dar a coñecer, este sábado ás 14.30 horas, tanto o labor do grupo, como o libro El múltiple que ocupa el espacio. Trátase dunha publicación que fai balance do VIII Foro Internacional de Creación na Fronteira, que o grupo dirixido pola profesora Ana Soler desenvolveu en 2024 en Pontevedra, coa colaboración do Concello.
A noción de corporalidade e a idea de diáspora son os dous fíos condutores da exposición que deste este xoves reúne na Sala Universitaria Profesor Manuel Moldes as creacións de 17 artistas, a meirande parte formados na Facultade de Belas Artes. Coa tamén egresada deste centro Cora Novoa como comisaria, esta mostra conecta, sinala, un conxunto de “prácticas diversas que chegan a través de imaxes, obxectos, textos, rexistros, pantallas, xestos e procesos” e que comparten “unha atención común ao corpo como lugar de experiencia, arquivo vivo e medio de relación”. Baixo o título de Cando falo de corpo, a exposición promovida co apoio da Deputación de Pontevedra propón tamén un achegamento ao traballo dun conxunto de artistas naturais ou formados en Galicia.
O vicepresidente da Deputación, Rafael Domínguez; o director da Área Adxunta á Vicerreitoría, Luis Torres, e o vicedecano de Belas Artes e coordinador da sala, Ignacio Pérez-Jofre, participan na tarde deste xoves na inauguración dunha exposición que poderá visitarse ata o 24 de abril. Como destaca Pérez-Jofre, trátase dun proxecto que responde “a unha das liñas de traballo da sala, que é a de contar con comisarias e artistas novas e novos, vinculados á facultade”. De feito, tanto Novoa como boa parte das e dos artistas de diferentes xeracións participantes formáronse neste centro e contan na actualidade “cunha traxectoria moi interesante, recoñecida con premios, residencias ou bolsas”, subliña Pérez-Jofre. Ao mesmo tempo, o coordinador da sala de exposicións do campus subliña o interese dun proxecto que afonda tamén “na idea do desprazamento, xa que moitos destes artistas, por diferentes circunstancias, atópanse fóra de Galicia”.
Desenvolvido polo Concello de Pontevedra, Taller Abierto e as profesoras da UVigo Begoña Paz, Iciar Ezquieta e María Covadonga Barreiro, o proxecto Pontevedra Debuxada deu como resultado tres mapas ilustrados, nos que Natalia Umpiérrez, Aida Alonso e Paula Chesire propoñen unha reinterpretación artística do rueiro da cidade. O proceso de traballo que deu lugar a estes planos e os resultados dos talleres realizados no marco desta iniciativa centran a exposición que deste este xoves pode visitarse na sede da Vicerreitoría do campus. Organizada polas docentes das facultades de Ciencias da Educación e do Deporte e Belas Artes, presenta unha unha serie de pezas que permiten achegarse á elaboración destes planos artísticos, xunto a unha selección dos traballos realizados por máis de 40 nenas e nenos en tres obradoiros centrados nos procesos de traballo das ilustradoras.
A tenente de Alcaldía, Eva Vilaverde, e o director da Área Adxunta á Vicerreitoría, Luis Torres, participan na tarde deste xoves na inauguración dunha exposición que poderá visitarse ata o 26 de marzo na Casa das Campás. A mostra, sinalan as súas promotoras, “permite descubrir diferentes aspectos do proceso creativo”, reunido “probas, técnicas, materiais e reflexións que explican como se constrúe unha cartografía emocional da cidade”.
No seu ensaio Un cuarto propio (1929), a escritora británica Virginia Woolf incidía na necesidade de que as mulleres teñan un espazo propio para crear, idea que constitúe o punto de partida da exposición que desde este mércores pode visitarse na Sala O Abrigo, da Facultade de Belas Artes. Promovida polo colectivo estudantil Luscofusco, con motivo da conmemoración este domingo do Día Internacional da Muller, esta mostra reúne as creacións de 15 alumnas da facultade, baixo o título de Un Abrigo Propio. “O libro de Virginia Woolf funciona como premisa”, sinalan as organizadoras dunha mostra colectiva que emprega a idea dun “cuarto propio” como fío conceptual dunha exposición que propón “formular un lugar, físico ou figurado, propio unicamente de mulleres”.
A exposición que se inaugura na tarde deste mércores reúne obras pictóricas, fotográficas ou escultóricas, nas que 15 estudantes do Grao en Belas Artes “plasman a súa idea dunha habitación propia”. Nomeadamente, a mostra presenta as creacións de Ana Piñeiro, Aroa González, Creep, Dana Latorraca, Guadalupe Díez, Loreña Añón, Marina Saavedra, Mencía Fana, Noa Fontán, Paula Romay, Rain Ramos, Sara Ricoy, Sofía Saraiba, Victoria Rodríguez e Nila.
Os efectos e as aplicacións de tecnoloxías como a intelixencia artificial ou a aprendizaxe automática na investigación e na práctica artística son uns dos focos de análise da rede de investigación Artistic Intelligence. Responsiveness, accessibility, responsibility, equity (ARTinRARE). Financiada polo programa COST da Unión Europea, esta rede reúne este xoves e venres 53 investigadoras e investigadores de 20 países no campus de Pontevedra e centra o seu traballo en conectar a investigación artística baseada na práctica con outras culturas investigadoras, a xestión de datos ou as novas ferramentas tecnolóxicas. Liderada polo Instituto de Investigación en Arte, Deseño e Sociedade (i2ADS) da Universidade do Porto, esta rede ten entre as integrantes do seu comité de xestión á profesora da UVigo Holga Méndez, coordinadora do encontro que se desenvolve na Facultade de Belas Artes e na Vicerreitoría do campus.
Belas Artes acollía na mañá deste xoves a apertura desta segunda xuntanza xeral de ARTinRARE, un proxecto que conta coa participación de máis de 200 artistas e investigadores nos seus diferentes grupos de traballo. O seu punto de partida é o concepto de artística intelixencia, termo que fai referencia “á capacidade colectiva da investigación artística baseada na práctica para xerar impacto e valor máis aló dos resultados singulares e específicos dun proxecto individual”, como sinala Méndez. A idea, engade, é que esta iniciativa permita ir máis aló das investigacións e prácticas artísticas individuais para “facer visibles diferentes modos de proceder”, contribuíndo á súa conexión con “todas as formas de produción de coñecemento”. A través dunha análise interdisciplinaria, engade, “esta acción coordina a aplicación de novas técnicas computacionais, como a aprendizaxe automática e a intelixencia artificial, á investigación baseada na práctica en todas as artes”.
A sala O Abrigo da Facultade de Belas Artes retoma a súa programación de exposicións cunha mostra na que presenta os resultados finais dun taller de fanzines colaborativos, no que dez estudantes de facultade traballaron conxuntamente na elaboración dunha publicación con materiais reciclados. O obradoiro que dá lugar a esta mostra desenvolveuse o pasado mes de decembro nesta sala coordinada polo colectivo estudantil Luscofusco e foi impartido pola egresada Nato Brandariz. Centrado no desenvolvemento dun fanzine cunha idea común, que reunise as propostas das e dos diferentes participantes, esta actividade levou á creación dun “relato conxunto cada día diferente”, co que construíron unha historia que combina “monxas, paxaros, un home que se cre máis listo que un animal, caos, texturas, cor e diversión”, apuntan desde Luscofusco.
A publicación realizouse principalmente con materiais reciclados, como cartolinas, periódicos, revistas, fotos ou cartas, dando lugar a unha historia que “transcorre a través dos recortes que se xeraron”, que agora se presenta impresa a maiores dimensións nesta exposición. Baixo o título de Expo fanzinera, a mostra inaugurase na tarde deste martes e poderá visitarse ata o venres 6 de febreiro.