Logotipo Universidade de Vigo

Select your language

17/11/2026

Unha peza romana con dúas facianas contrapostas, propiedade do Museo do Prado, constitúe o punto de partida de Bifrontes, unha exposición que reúne as obras de 16 artistas vinculados á Facultade de Belas Artes no Edificio Sarmiento do Museo de Pontevedra. Coa profesora Covadonga Barreiro como comisaria, esta exposición articúlase arredor dunha peza que "convida a pensar a coexistencia de categorías contrapostas e imaxinar aquilo que acontece xustamente no límite, no encontro entre o pasado e o futuro”, sinala. A través das creacións de persoal docente e investigador, de antigas e antigos docentes e de alumnado actual e pasado, esta exposición permite precisamente unha “mirada bifronte” ao pasado e futuro da facultade, nun momento marcado pola remuda xeracional do seu profesorado.

Bifrontes inaugurarase na tarde deste mércores, podendo visitarse ata o 14 de febreiro, e foi presentada nesta xornada polo vicepresidente da Deputación de Pontevedra, Rafael Domínguez, e a directora do museo, Ángeles Tilve, xunto á súa comisaria. Ambos subliñaron a importancia para a institución museística das colaboracións coa facultade, previamente reflectidas en exposicións como Campo de sementes 2, Pregar a pintura e Pinturas negras, “e que agora continúa con Bifrontes”, sinalou Tilve, quen sinalou a aposta desta institución por unha liña de traballo que leva a que “pezas do noso museo sirvan para a investigación e a creación contemporánea”. Pola súa banda, o vicepresidente da Deputación salientou que para o museo “é fundamental incrementar as relacións con Belas Artes”, pondo de relevo que o diálogo entre a facultade, a institución museística e a Bienal de Pontevedra “é unha das cousas máis rupturistas que temos en Pontevedra”.

Ler a nova completa no DUVI